...

Алматы қаласы КММ Табиғи ресурстар және табиғат пайдалануды реттеу басқармасының «Медеу» мемлекеттік өңірлік табиғи паркі

Алматы қаласы Табиғи ресурстар және табиғат пайдалануды реттеу басқармасының «Медеу» мемлекеттік өңірлік табиғи паркі коммуналдық мемлекеттік мекемесі Алматы қаласы әкімінің 2001 жылғы 10 желтоқсандағы №3/332 қаулысы негізінде құрылды.

«Медеу» паркіне Кіші Алматы шатқалында орналасқан Медеу, Шымбұлақ және Бұтақовка шатқалдары кіреді.

Парктің жалпы аумағы 708 гектарды құрайды.

Парк аумағының геоморфологиялық құрылымының басты ерекшелігі – оның сатылы бедері. Жер бедері орта таулы, аласа таулы және төбелі-аласа таулы аймақтардан тұрады. Абсолюттік биіктігі теңіз деңгейінен 1267 метрден 2250 метрге дейін жетеді. Аумақтың басым бөлігін өзен аңғарлары, жайылмалар, жайылма үсті террасалар және еңістігі 35°-қа дейін, кей жерлерде 55–60°-қа дейін жететін тік беткейлер алып жатыр. Өзен аңғарлары тектоникалық қозғалыстар мен қатал климаттық жағдайлардың әсерінен күрделі құрылымға ие.

Шекаралары

Парк шекарасы Горная көшесінің Бұтақовка өзені арнасымен қиылысқан жерінен басталып, өзен арнасымен батысқа қарай Кіші Алматы өзенімен қосылғанға дейін созылады. Одан әрі Кіші Алматы өзені бойымен солтүстік-батысқа қарай 70 метр жалғасады.

Келесі бағытта аз қабатты тұрғын үй массивінің шекарасынан 20 метр қашықтықта оңтүстік-батысқа қарай қалалық шекараға дейін өтеді. Бұдан кейін қалалық шекара бойымен оңтүстік-шығысқа қарай, «Просвещенец» ЖШС аумағын қоса қамтып, қалалық шекараның оңтүстік иініне дейін жалғасады.

Одан әрі оңтүстікте және солтүстік-шығыста қалалық шекара бойымен, «Бұтақовка» шатқалын қамти отырып, батыс бұрылысына дейін созылады. Кейін Алматы – Бұтақовка автомобиль жолына дейін жалғасып, сол жол бойымен Горная көшесіне шығады. Соңында Горная көшесі бойымен оңтүстік-шығысқа қарай Бұтақовка өзені арнасымен қиылысқан жерге дейін жалғасады.

Қорықтық режим аймағының жалпы аумағы 149 гектарды құрайды. Оның ішінде 101,9 гектары – қорықтық аймақтың ядросы, 47,1 гектары – буферлік аймақ.

Қазақстан Республикасының 2006 жылғы 7 шілдедегі №175-III «Ерекше қорғалатын табиғи аумақтар туралы» Заңына сәйкес бөлім қызметкерлері экологиялық бақылау бекеттерінде (№1 және №2 экобекеттер) тұрақты бақылау жұмыстарын жүргізеді.

Ай сайын парк инспекторлары үшін кезекшілік кестесі бекітіледі. Олар ерекше қорғалатын табиғи аумақта демалушылар, тұрғындар және автокөлік жүргізушілері тарапынан табиғатты қорғау талаптарының сақталуын қадағалайды.

№1 экобекет

Инспекторлар күн сайын кезекшілікке шығып, келесі жұмыстарды атқарады:

• демалушылармен түсіндіру жұмыстарын жүргізеді;
• заңсыз көше саудасы анықталған жағдайда Алматы қаласы Полиция департаментімен бірлесіп әкімшілік айыппұлдар салуға қатысады;
• парк аумағын тазалау және санитарлық жұмыстарын жүргізеді;
• жасыл желектерге түгендеу жұмыстарын өткізеді;
• өртті ерте анықтау жүйесінің жұмысын тексеру мақсатында жоспардан тыс оқу-жаттығулар өткізеді;
• учаскелік полиция қызметкерлерімен бірлесіп ЕҚТА қағидаларын бұзған фотографтарға қатысты әкімшілік хаттамалар рәсімдейді;
• ақпараттық билбордтарды сырлап, жаңартып, ретке келтіреді;
• Қалалық мобильділік басқармасымен бірге жол белгілерін жөндеу, сырлау және қажет жерлерге жаңа белгілер орнату жұмыстарын жүргізеді;
• субұрқақ пен жол бөгегіш маңындағы аумақтарды абаттандырып, көгалдандыру жұмыстарын атқарады;
• «Алматы Тазалық» ШЖҚ МКК қызметкерлерімен бірлесіп қураған ағаштарды жинау жұмыстарын жүргізеді;
• рейдтер барысында туристер мен демалушылар көп жиналатын орындарды тексеріп, өрескел құқық бұзушылықтардың алдын алады;
• өзендер мен су айдындары маңындағы қауіпсіздік ережелері, тазалық сақтау және өрт қауіпсіздігі жөнінде тұрақты түсіндіру жұмыстарын жүргізеді;
• қыс мезгілінде қар мен мұзды тазалау, сондай-ақ қарды шығару жұмыстарын ұйымдастырады.

№2 экобекет

№2 экобекет инспекторлары тәулік сайын кезекшілікке шығып, «Шымбұлақ» шатқалының ерекше қорғалатын табиғи аумағына көлік құралдарының кіруін бақылайды.

Алматы қаласы әкімдігінің 2016 жылғы 8 сәуірдегі №2/122 қаулысына сәйкес қоршаған ортаға түсетін антропогендік және көлік жүктемесін азайту мақсатында «Шымбұлақ» шатқалына автокөлік құралдарының кіруіне шектеу енгізілді.

Заңнамада көзделген арнайы санаттағы көлік құралдарына, коммуналдық және жедел қызметтерге, осы аумақта тұратын немесе жұмыс істейтін жеке және заңды тұлғаларға қызмет көрсететін көліктерге, сондай-ақ электр көліктеріне ғана кіруге рұқсат беріледі.

Бақылау бекетінде 18 630 электр көлігі тіркелген.

Сонымен қатар, Алматы қаласы әкімдігінің 2023 жылғы 6 наурыздағы №1/166 қаулысына сәйкес:

• 2023 жылғы 1 сәуірден бастап осы аумақта тұратын тұрғындар мен оларға қызмет көрсететін іштен жану қозғалтқышы бар көліктердің кіруіне шектеу енгізілді;
• 2023 жылғы 1 қыркүйектен бастап осы аумақта қызметін жүзеге асыратын заңды тұлғалардың іштен жану қозғалтқышы бар көліктерінің кіруіне шектеу қойылды.

Қазіргі таңда тек электр көліктеріне, арнайы техникаға, коммуналдық, жедел және авариялық қызмет көліктеріне ғана кіруге рұқсат етіледі.

Біздің басымдықтарымыз

• мемлекеттік табиғи қорды, ландшафтарды және табиғи кешендерді сақтау;
• экожүйелердің тұтастығын қамтамасыз ету;
• бұзылған табиғи нысандарды қалпына келтіру;
• табиғи кешендерді рекреациялық пайдалану жағдайында қорғаудың ғылыми әдістерін енгізу;
• халыққа экологиялық білім беру, экскурсиялар, оқу сабақтары мен студенттердің өндірістік тәжірибесін ұйымдастыру;
• реттелетін туризм мен демалысты дамытуға қолайлы жағдай жасау.

Ерекше қорғалатын табиғи аумақта тыйым салынады

• табиғи нысандарды, тарихи, мәдени және археологиялық ескерткіштерді жоюға немесе бүлдіруге;
• өзендерді, көлдерді, бұлақтарды және топырақты ластауға;
• қауіпті және ластаушы заттарды сақтауға;
• арнайы белгіленген орындардан тыс жерде шатыр тігуге және от жағуға;
• жолдан тыс жерлерде көлікпен жүруге немесе көлік қоюға;
• құстардың ұяларын, аңдардың індерін және құмырсқа илеулерін бұзуға;
• ағаштарды заңсыз кесуге немесе сындыруға;
• былтырғы шөп пен жапырақты өртеуге, сәндік және дәрілік өсімдіктерді жинауға;
• малды өз бетінше жаюға және шөп шабуға;
• тастар мен ағаштарға жазулар мен белгілер салуға;
• парк әкімшілігінің рұқсатынсыз ғылыми немесе іздестіру жұмыстарын жүргізуге.

Егер Сіз ерекше қорғалатын табиғи аумақтарда, заңсыз құрылыстың немесе басқа да келеңсіздіктерге куә болсаңыз, онда сенім телефонына хабарласыңыз +7 (727) 292-02-91, +7(727)292-02-86, +7(727)292-02-38....